Hljómaldan
Hljómaldan er vettvangur fyrir hlaðvarp af margvíslegum toga, sem Markús Örn Antonsson vinnur til birtingar á ýmsum miðlum. Markús býr að langri reynslu í fjölmiðlun sem ungur blaðamaður og nemi á Morgunblaðinu, fréttamaður við stofnun Sjónvarpsins, ritstjóri tímaritsins Frjáls verslun og útvarpsstjóri Ríkisútvarpsins. Þar beitti hann sér m.a. fyrir innkomu RÚV á Internetinu og dreifingu frétta og annars dagskrárefnis um það. Á síðari árum hefur Markús gert vídeómyndir fyrir samfélagsmiðla og tekið saman endurminningar sínar í rafrænu tímaritsformi sem nálgast má á heimasíðu hans, rafrit.com
Hljómaldan
Árið mitt í Ameríku.
Markús Örn Antonsson, fyrrv. útvarpsstjóri, borgarstjóri og sendiherra, var einn hinna mörgu, sem gerðu hlé á námi í menntaskóla til að dveljast árlangt í Bandaríkjunum á vegum American Field Service. Hann var við nám í Corvallis High School í borginni Corvallis í Oregon fyrir rúmum 60 árum. Markús Örn fjallar hér um kynni sín af bandarísku þjóðlífi í embættistíð John F. Kennedy, forseta, sem dáður var um víða veröld. Veður voru válynd í heimsmálum 1961-1962 og geimferðakapphlaup stórveldanna í algleymingi. Það ríkti þó velsæld og bjartsýni í Bandaríkjunum eins og Markús kynntist á ferðum sínum um landið, með náminu í skólanum og á heimili Roberts-fjölskyldunnar, sem hann bjó hjá. Í skólanum eignaðist hann marga góða vini, sem hann hefur ennþá samband við.